CHAMA cha siasa cha Alliance for Change and Transparency ( ACT-Tanzania ) ambacho kinatajwa kuasisiwa na mwanasiasa machachari, Zitto Kabwe na vigogo wa zamani wa CHADEMA, jana kilipatiwa usajili wa kudumu na msajili wa vyama vya siasa nchini,Jaji Francis Mutungi....
Jaji Mutungi alikabidhi cheti cha usajili wa kudumu kwa kaimu mwenyekiti wa chama hicho, Kadawi Limbu katika hafla iliyofanyika mjini Dodoma jana....
Kuhusishwa kwa Zitto Kabwe na ACT-Tanzania
Habari za kuaminika kutoka ndani ya chama hicho zinaeleza kuwa Zitto ambaye ni mbunge wa Kigoma kaskazini kupitia CHADEMA ndiye mlezi wa chama hicho....
Pia mjumbe wa zamani wa kamati kuu ya CHADEMA,Dr. Kitila Mkumbo naye anaelezwa kuwa mwanachama mwanzilishi wa chama hicho....
Zitto na Kitila wanahusishwa na chama hicho baada ya kuvuliwa uanachama wa CHADEMA Novemba 22 mwaka jana kwa kutuhumiwa za kula njama za kuhujumu chama hicho....
Hata hivyo Zitto alipinga uamuzi huo na kuamua kufungua kesi mahakama kuu kupinga kuvuliwa uanachama wake...
Ukweli wa Zitto kuwa karibu na chama hicho unajionyesha zaidi kutokana na wadhifa wa katibu wa muda wa ACT-Tanzania kushikwa na Samson Mwigamba,ambaye alivuliwa vyeo vyake kutoka CHADEMA pamoja na Zitto na Dr. Mkumbo kwa tuhuma zinazofanana....
Bila kusahau kuwa wanachama wengi wa ACT-Tanzania wanaelezwa kuwa wanatoka katika baadhi ya mikoa ambayo ilikuwa chini ya Zitto,wakati alipokuwa mwenyekiti wa CHADEMA kanda ya magharibi...
Alipoulizwa juu ya habari ya Zitto kuwa mlezi na Kitila kuwa mwanachama, Mwigamba hakukiri wala kukataa juu ya jambo hilo....
"Hayo mambo ya nani ni mwanachama wetu kwa sasa siwezi kuyazungumzia.Jambo muhimu hapa tumepata usajili wa kudumu" Alisema Mwigamba ambaye alijibu kwa nia ya simu kutoka Arusha ambako alikuwa kwa shughuli binafsi na kumfanya akose shughuli ya kukabidhiwa cheti cha usajili...
Msajili ataka siasa za ukomavu
Akizungumza kabla ya kukabidhi cheti hicho, Jaji Mutungi aliwataka viongozi wa chama hicho kufanya siasa zenye ukomavu kwa kuzingatia sheria ya vyama vya siasa na kanuni zake
Jaji Mutungi aliwataka pia viongozi hao kuwaheshimu wanachama wao kwa kuwa vyama vingi vikishapata usajili viongozi huwasahau wanachama wao....
"Mmepata usajili, mmeikuta nchi yetu ina amani hivyo tunaomba mfanye siasa ambazo zitahakikisha nchi inaendelea kuwa na amani," alisema Jaji Mutungi akitaka chama hicho pia kishiriki katika kutoa maoni ya kuzifanyia marekebisho sheria ya vyama vya siasa na sheria ya gharama za uchaguzi
Kwa upande wake msaidizi wa msajili wa vyama vya siasa,Sisty Nyahoza,aliipongeza ACT-Tanzania kwa kutimiza masharti na hatimaye kupata usajili wa kudumu...
Alisema chama hicho kilifanikiwa kuleta wanachama zaidi ya 200 katika mikoa 10 ya Tanzania Bara na mikoa miwili kutoka Tanzania Visiwani...
"Epukeni kujihusisha katika vurugu, sheria inakataza vyama vya siasa kutumia nguvu katika shughuli za siasa,hali hiyo inafifisha demokrasia na kuwatia hofu wanachama" alisema
Akizungumza mara baada ya kupokea cheti cha usajili wa kudumu,Limbu alisema chama hicho kimepanga kufanya demokrasia ya kweli nchini...
"Chama chetu hakitakuwa chama cha vurugu,kitakuwa ni chama cha heshima,hakitakuwa na mmiliki,kitakuwa ni chama cha wanachama, hatutegemei migogoro na tutafanya siasa za kistaarabu" Alisema Limbu
Akizungumzia chama hicho kuwa na watu maarufu nyuma yake,Limbu alisema hayo ni masuala ya kusikia.
"Sisi ni wanasiasa wazoefu,tunajiamini,hatuna sababu ya kufanya kazi kwa kuwa kuna watu nyuma yetu wanategemewa kuwa viongozi"
"Tunaamini wapo watu na viongozi wa vyama vingine wanakerwa na demokrasia ndani ya vyama vyao,vipo vyama ambavyo ni makampuni ya watu, ukionekana kugusa maslahi ya mtu unafukuzwa, tunawakaribisha waje tujenge demokraia.
"Tunaamini watu wa namna hiyo ni moja kati ya chachu ya watakaokuja kujenga chama chetu,tunamhitaji mtu yeyote mwenye uwezo na nguvu, atakayejenga demokrasia ya kweli" alisema
ACT yaanza na wanachama 4,200
Mwigamba alisema chama hicho chenye mlengo wa kati-kushoto kina wanachama 4,200 kutoka mikoa 13 ya Tanzania Bara na Zanzibar....
"Chama chetu kinaamini katika ujamaa na demokrasia jamii,yaani tunataka kurudisha u-Nyerere" alisema Mwigamba ambaye alitaja kauli mbiu ya chama hicho ni 'Tanzania Kwanza,Uwazi na Mabadilko'
0 comments:
Post a Comment