Mamlaka
ya Mawasiliano Tanzania (TCRA) imesema mtambo uliozinduliwa hivi
karibuni na Rais Jakaya Kikwete kwa ajili ya kudhibiti udanganyifu
katika mitandao ya simu za kimataifa, unakabiliwa na changamoto ikiwamo
kutokuwa na uwezo wa kubaini uhalifu wa simu unaofanywa ndani ya nchi.
Hayo yalisemwa jana jijini Dar es Salaam na Meneja wa Mawasiliano wa
TCRA, Innocent Mungy, kwa niaba ya Mkurugenzi Mkuu wa mamlaka hiyo,
Prof. John Nkoma, wakati akizungumza na waandishi wa habari kuhusu
matumizi ya mtambo huo katika kudhibiti matumizi mabaya ya simu.
Akifafanua, Mungy, alisema mtambo huo unaojulikana kama
Telecommunication Traffic Monitering System (TTMS), ulianza kutumika
nchini Oktoba mwaka jana, huku ukiwa na uwezo wa kubaini mitandao ya
mawasiliano ya simu yanayotoka nje pekee na kushindwa kwa yale ya ndani
ya nchi.
Kwa mujibu wa Mungy, mtambo huo ambao unafungwa na mfumo wa kudhibiti
udanganyifu (Anti-fraud management system), una uwezo wa kutambua
mawasiliano ya udanganyifu katika mitandao na namba za ulaghai za nchi
zinazotumika kuruhusu kupitisha mawasiliano ya kimatifa nchini kitendo
ambacho ni kinyume na sheria za kudhibiti mawasiliano ya simu.
Kutokana na hilo alisema, TCRA kwa ushirikiano na watoa huduma za simu
na vyombo vya usalama inafanya uchunguzi wa kitaalamu ili kubaini uwapo
wa udanganyifu huo ambao pamoja na masuala ya kiusalama, lakini pia
unaikosesha mapato serikali.
“Kumekuwa na kampuni na watu binafsi wanaowezesha simu zinazopigwa
kutoka nje kufika nchini bila kupitia kwenye njia rasmi na hivyo
kuikosesha serikali na kampuni za simu mapato halisi.
Watu hawa hutumia ‘internet’ kuruhusu simu zinazopigwa kutoka nje ya
nchi na kuzifanya zionekane kama zimetoka hapa nchini kwa kutumia kifaa
kinachojulikana kwa jina la Sim Box,” alisema.
0 comments:
Post a Comment